一個叫做 BidenCash 嘅地下信用卡市場為咗吸客，大手筆送出120萬張信用卡資料，據專家資料顯示，呢啲信用卡資料都係來自之前被植入惡意軟件嘅POS 系統及購物網站，以及其他私隱盜竊惡意軟件。 當然 BidenCash 唔止得咁少資料，今次開心 share 目標只係引多啲人幫襯。
BidenCash 地下信用卡市場喺今年 6 月開業，初期已經試過免費送出信用卡資料任人下載。而為咗加強推廣範圍，今次幕後嘅犯罪集團仲將呢啲資料免費放去各大地下討論區，以及將資料儲存喺正常網域，就算唔識得用暗網嘅人，都好容易接觸到。而喺呢堆信用卡資料中，唔係全部都係舊貨，當中除咗有 7 成喺之前已被公開或過期，仲有大量信用卡嘅有效日期介乎2023至2026年，所以只要持卡人並未發現信用卡資料被盜，騙徒都仲可以用嚟網購。而發現呢堆信用卡資料嘅網絡安全機構 D3Labs 嘅專家就估計，應該仲有 10% 有效，即係大約仲有 10 萬，對騙徒來講，今次真係早發現早享受喇。
