防毒軟件公司 Avast 最近捕獲一款名為 FakeCrack 嘅惡意軟件，專門竊取受害者儲存於電腦內嘅帳戶登入密碼、信用卡及加密錢包資料，呢款惡意軟件正以每日平均感染 10,000 部電腦設備嘅速度擴散。FakeCrack 會偽裝為破解版 Windows 版資源改善軟件 CCleaner Pro，並借助搜尋引擎改良（SEO）技術，令受害者更容易透過喺 Google 搜尋器輸入「cracked」、「serial key」、「free download」呢啲關鍵字，喺搜尋排名上發現佢嘅儲存網站，再引導去合法嘅檔案分享平台如filesend.jp或mediafire.com，增加佢嘅可信性。當受害者下載及安裝ZIP檔案，會發現需要輸入解鎖密碼1234，加壓方式主要係為咗避開防毒軟件嘅偵測。
安裝 FakeCrack 後，惡意軟件會盜取儲存於瀏覽器內嘅帳戶登入資料及信用卡資料，同埋佢亦會監測住剪貼簿（clipboard）嘅動靜，如發現受害者複製咗加密貨幣錢包嘅地址，佢就會自動換上犯罪集團控制嘅錢包地址，等受害者錯誤地將資產轉帳入去。所以話破解版、免費版軟件真係極度危險，大家都係唔好貪平或貪方便，走去下載呢啲軟件嚟用喇！
