提到 Leica ，會聯想到咩？大陸人愛機？老爺手動機？雖然 Leica 間中都會推出幾部 DC ，不過都是用 Panasonic 的貼牌機，吸引力認真麻麻。直至今年，似乎 Leica 的研發成果陸續出現，繼之前推出的 APS-C 無反 Leica T ，今日又發布多一部全片幅的換鏡自動對焦相機 Leica SL ，會否能夠為這個德國老牌打開新天地？
如果你以為同過往的全片幅 M 系相機一樣，只不過加上自動對焦功能，就大錯特錯。因為如果要將 Leica SL 與現時相機作比較，相信就是 Sony A7 RII 。採用 2400 萬像素 CMOS ，不單支援 4K 影片拍攝，亦能拍到 1080p 120fps 的慢動作影片。
除了拍片能力強，影相能力都好強，提供最快 0.1 秒對焦及 49 點自動動對，同時支援最多每秒 11 張的 DNG+JPEG 連拍。更為相機加入 2GB 的緩衝記憶體，提高拍片及連拍的順暢度。Leica SL 亦設有觀景器，提供 440 萬像素解像度，反應夠快，就算影車影雀都無遲滯。
不過，最大驚喜位，反而是相機支援 Wi-Fi 、 GPS ，仲可以駁專用 app 連接手機遙控同 Live View ，在老牌相機都會出現這類功能，可見 Leica 進軍高階相機的決心有幾大。為配合使用舊鏡，今次特別推出大量轉接環，由 M 、 S 、T，甚至電影專用的鏡頭，會部都用得。
的確，如果只論機能， Leica SL 的確是頂級，無論對焦速度、連拍的能力、拍片的功能，都絕對是現時頂級相機之列，不過，由於設計上同一般的日本相機非常不同，需要一段時間先可以用得慣。至於價錢亦都是一個大門檻，單是機價就要 $56,500 ，配埋標準鏡（24-90mm F2.8-F4 ASPH.）就加多 $35,200 ，在德國鏡頭的光環之下，並非一般人可以買得起。
試相（像素減半）
