〔金仔韓遊〕貝類倉庫玩燒蜆三個字：鮮！鮮！鮮！

好多人都鍾意食海鮮，而去韓國，通常都是去鷺梁津食海鮮，不過，如果想平食但又夠新鮮，仲有無選擇？其實仲有好多選擇，而且有好多都是「放題」形式，價錢亦都夠平，但新鮮與否就好難講。而比較有保証就是名為조개창고（貝類倉庫）的任食燒蜆，有個大型水槽俾你自己揀蜆之外，食物種類又多，一定可以食餐飽。

老實講，要食任食海鮮，首爾都有好多，例如新村附近都有不少，不過，好多都是一個冰盤上枱，海鮮全部放在上面就算，就算有蜆有蟹俾你食，有幾新鮮大家心中有數。試過有一次去一間任食海鮮燒烤，竟然食肉好食過海鮮，搞到差少少對海鮮放題失去信心……

講回這間貝類倉庫，在首爾都有幾間分店，而今次選擇位放永登浦店，因為附近都有幾多地方可以行，同埋比較近地鐵站，不過最後都要搵起碼15分鐘先搵到，因為店面並非地鋪，而是三樓鋪（其他兩間都有少少難搵，不過為食好嘢就無計），要抬高頭先會望得到。坐?上三樓，一入去右手邊就見到個特大水槽，放滿帶子同不同大細的蜆，至於中間就有冰櫃，入面有鴨胸肉、雞肉串、腸仔、紫菜卷等等，都幾多食物揀。

鋪面店員不多，最重要是無冷氣！好彩有好多大窗，通風都夠，只要揀位坐近窗邊，不太熱亦不怕燒烤味上身。先講講規矩，食物任食，水任飲，其他飲料要收費，飲完放在籃內，走先計數。枱面有個洞，專門放蜆殻，其他垃圾就放在其他垃圾埇。而好似油埇的椅是可以掀開，有圍裙比你用，亦可以將私人物品放入去，店員會比張中文指引你，睇完就一清二楚。

第一時間當然拎蜆食，抬面有兩隻碟，一隻放海鮮，一隻其他食物，為免肚痛記得分清楚。去到水槽，應該有大拎大？錯，因為太大隻會燒好耐先開口，餓到死都未有得食，有大有細最好。同時亦可以拎埋不同肉類放在爐上面的鐵盤燒，一邊食一邊等最好。蜆同扇貝一樣，燒到開殻就食得，其實毋需再加味（即係牛油、芝士）都已經好鮮，亦都無砂，仲有燒鮑魚、特大扇貝可以揀，可以話重點必食，但由於燒的食間夠長，所以諗住剩食海鮮食到飽都幾難。而主食推介食物有燒薄餅、雞內串、鴨胸肉等，至於其他可以一試，不過不算太有特色。