自從5年前iPad出現之後，電子書及實體書之間的鬥爭就不斷，以前好多人都話，電子書足以取代實體書，以後無人印新機，全部發布上網、上app就算，但今日的發展又點？至少誠品香港開分店、三聯書局仍然生存，而根據美國出版商會指，今年上半年電子書更下跌10%，而實體書反而增加2.4%的印刷量，難道實體書會重見天日？
電子書下跌，代表實體書的生存空間會提升？就以商務印書為例，曾經是香港最大的書局之一，現時分店數目大約26間，睇落都算幾多，而除了大部分集中在新界及大學內，銅鑼灣、旺角、尖沙咀的三間分店亦繼續生存，不過，如果行過商務，都會發現經營方針上，與當年有所不同，除了賣書之外，出售文具、精品的位置增加。而香港誠品的做法亦一樣，精品的出售，可以話是主要收入來源之一。
1.專注度下降
至於賣書量方面，根據數據顯示，已經由2012年的最低點作出反彈，而每年都有個位數字上面的增加。當中最主要的原因，並非電子書無吸引力，而是對書的態度有所不同。當你願意拎住一本書出街，表現你對睇這本書有一定慾望，所以你有時間就一定會專心去睇書。但當你拎住一部iPad的時候，睇書只不過是其中一個功能，突然想開facebook、上網，轉頭已經想將要睇的書拋諸腦後，結果原本用一個月時間睇完一本書，足足花上半年都未睇完。
2.手感的重要
鐘意睇書，其實就是鐘意睇書的質感，每掀起一頁紙到下一頁，睇住書的厚度可以知道自己睇書的進度，故事發展大約去到前、中、後期，對於鍾意睇書的人來說，這些感覺都是電子書所無法取代。
3.閱讀上的不便
在網上買開電子書，都會發現原來下載的檔案，都必需指定的app，先可以開，而並非一個常用的文檔格式，因為你只是用錢買了這本書的閱讀權，而不是擁有權。兩者分別有幾大？閱讀權就是你只可以看，不能分享，別人想睇唯有同樣安裝相同app（當只得這個app有這本書時），先至睇到。但當你有手擁有權，你就可以隨時將書借比其他人睇，甚至出售這本書。
當然，我並不討厭電子書，甚至未有iPad之前，去旅行已經用黑白Palm睇電子書，當年一足一個月，就睇足一個月書，其實好方便。而現今的新一代，亦都好接受用iPad睇書，加上資訊在網絡上流通速度快，這個亦都是實體書無法做得到，亦無法好似以前一樣多人睇。不過，要電子書完全取代實體書，相信就算用多5年時間都未必做得到，始終實體書仍然有其生存空間。
