Google 助理在 2016 年推出，可說是與 iOS 的 Siri 對抗的最大手段，但講到語系，相對 Siri 差得遠，單是支援廣東話，已經高出成條街。不過，昨天 Google 宣布將推出 Google 助理廣東話版，舊用家只要升級軟件，便可以用到。雖然功能上暫時未有 Siri 咁萬能，但都叫做踏出開始的一步。 Google 助理
Google 助理廣東話版本同英文版一樣，可搜尋的答案、整理和提醒日程、打開 Google 相簿重溫上次旅行、播放流行 YouTube 影片等。適用於 Android 5.0 以上版本及 iPhone 或 iPad iOS 10 或以上版本。Android 用戶只要更新「Google」 應用程式至最新版本，將裝置語言設定成繁體中文（香港）； iOS 用戶則可以下載 「Google 助理」應用程式，將裝置語言設定為繁體中文（香港），就可以使用 Google 助理廣東話版本。
如果無用開 Google 助理的用家，只要在手機或平板電腦上按住主屏幕按鈕（即係屏幕下面圓形個圖案），或是說出「Ok Google」，之後再說卞指令就用到。而今次亦會與 csl. 、 KKBOX 、 MOOV 、 Openrice 、 The GULU 及八達通合作，用家只要進入 Google 助理之後，說出「想同KKBOX傾偈」，便可進入這些App的專用聊天介面，之後便可進行數據用量查詢、播歌搵歌、搵餐廳、擺飛訂位等動作，當然你首先要登入相關App先用到以上功能。
在現階段，Google 助理廣東話版對於廣東話口音仲未好準，如果有懶音，都幾容易認錯，而App的連接及應變能力上，亦都無Siri咁好，例如聽歌的話，需要講到明想從哪個媒體介面先用到，好似「幫我用Youtube播張國榮嘅歌」咁先得，唔似Siri叫一句「播張國榮嘅歌」就會自己想辦法播，而助理在使用上，亦唔能夠完全唔用手，好似進入專用App的聊天介面後，要手動關上先可以用到其他語音服務，但始終有AI背後學習，相信日後會慢慢有改善。
