一般精明的朋友去旅行時，一定會隨身帶著「可入機場貴賓室」的信用卡，而小編就主力用緊「國泰航空專尚信用卡」，因為可以於亞太地區多個環亞機場貴賓室免費入場；或者，亦都有人會用範圍更廣泛的「Priority Pass」（部份信用卡可免費入會），可以進入多達全球幾百個機場貴賓室。
不過好多人以為只是上機前，入禁區後先會搵貴賓室坐吓、休息、食嘢。並非太多人知道，原來早前香港國際機場禁區外，都開設了「環亞機場貴賓」，等大家回港落機後，都可以去貴賓室食完嘢先返屋企。
禁區外的環亞機場貴賓喺邊？原來就在第一航廈與第二航廈之間的通道，平時一落機行去「機場快線站」時，並不會留意在右邊有一條不太起眼的扶手電梯，一落去就會見到間環亞機場貴賓在右邊，非常隱蔽。
小編都幾鍾意一返港就先去貴賓室食嘢先，入場就同禁區內的有點不同，如果手拎信用卡入場的話，就要出示返機票（記得落機後不要掉走），而手持Priority Pass的話，就只需要出示身份證明文件就得（有時接機送機都可以去食）。
在貴賓室內可以選擇的食物都不少，一般熱葷、炒飯、沙律、甜品、小食及飲品一應俱全，感覺可以揀的款式比禁區內的貴賓室更多，食飽飽先慢慢返屋企都未遲啦。
