數最近日本娛樂圈最爆新聞，唔係《SMAP X SMAP》錄影最後一集班仔扮到幾不捨、場面幾感人，更加唔係新垣結衣套《逃跑可恥，但很成功》又再破收視紀錄。而係男星成宮寬貴被週刊爆佢吸毒，事務所驗完血兼嚟個攬炒引退嘅事件。
事件唔經唔覺發酵咗幾日，週刊方面仲聲大夾惡話自己有料喺手，隨時可以爆片爆相。不過，成宮方面就一於少理，話到明引退之心好堅定，玩到不惜賠過億遣約金，都唔會再踏入娛樂圈咁話，完全唔回應週刊對成宮任何指控。
雖然話臨死之人唔同你玩就最惡，但好多演藝圈前輩就唔多撐佢咁做法，老牌歌手和田現子早前喺節目度話，唔明點解成宮咁易放棄，仲話佢應該繼續戰鬥落去咁話喎。不過，成宮Fans睇完就唔多Like，暗爆咗成宮雖然引退唔再演戲，但呢幾年佢已默默地轉型進入時裝界，幫過名牌做設計師，唔使擔心搵唔到食咁話喎。
來源：マイナビニュース
