松坂桃李分手又一力作拍《死神筆記》見聲唔見樣都肯制

日本男星松坂桃李同女神綾瀨遙，今年初因婚事傾極唔掂，搞到最終分手收場，萬千宅男當然叫好。有傳聞話，女神一直等身為奀星嘅松坂事業有少少起色，就立即下嫁專心等生B，惟男方唔爭氣，拍親劇都收視低迷、電影仲慘成票房毒藥，即使成個藝能界畀幾多機會都谷佢唔起。

最近，佢又飛雲上身搏到個機會，就係去參戰今年大片《デスノート Light up the NEW world》（2016年死神筆記），不過電影公司唔知係咪驚佢搭沉船，「安排」佢唔使出樣，只負責幫新死神「BEPO」配音，同東出昌大組隊搵奇拿，邊個係東出昌大唔係重點，重點其實係，電影公司同時又話當年「三巨頭」（即松山研一、藤原龍也、戶田惠梨香）全部都會喺新片度現身，立即將「松坂參戰」打成為碎料一單，當然松坂都有交足戲，話自己係《死神筆記》Fans，可以加入相當高興。不過佢補咗句話電影中死神把聲有經過特殊處理，好可能聽不出係佢配音，希望觀眾能夠投入欣賞劇情同演員喎。