新垣結衣新劇開播片尾曲成重點

今時今日嘅日本，以女星新垣結衣嘅地位，幾乎做乜都掂，好似結衣BB套新劇《逃げるは恥だが役に立つ》（所有人都繹：逃跑很可恥但很有用）噚晚首播，就拎到10.2％嘅高收視。（以火十劇（即星期二10:00PM）嚟講，已經係高收。）勢估唔到，套劇最大亮點，竟然發生喺完劇嘅片尾曲度。呢首歌係由男主角星野源主唱，原先首歌為配合歌名「戀愛」嘅主題，特意創咗段「戀愛舞」。當成為劇集片尾曲後，就緊係要搵結衣BB喺劇中家居度跳番Part舞啦。結果，班禽獸……宅男睇完，緊係有讚無彈，仲表示話會練熟佢跟結衣BB齊齊跳。

講番套劇，喺早前無數次宣傳，電視台劇組打咗無數次開口牌話，套劇係講結衣BB嘅「職業結婚」嘅新婚生活，所以套劇充滿「換衫、出浴、床戲」，而有傳聞話結衣BB「秘交」咗幾年嘅三浦春馬，近日公開咗同舞蹈員拍拖，搞到「被甩拖」嘅結衣BB想借此撇甩咗玉女形象嚟一次大解放喎，班禽獸……宅男聽到緊係心花怒放，話即使明知無乜料到，有香肩就睇香肩，有邊就睇邊，有罅睇罅喎。