近年不少人為求慳位，都會改用大屏幕的手提電腦，來當成家中的 Desktop 使用，不過當在家中搬來搬去時，先發現原來都好重。而最近 LG 推出的 gram 手提電腦，具有 15.6 吋屏幕，但機身重量卻只有不足 1kg ，就算女士們拎住四圍走，都應該好方便。而機價為 $11, 980 至 $14,980 不等。覺得貴？輕當然要付出少少代價。
今次 LG 的 gram ，總共會推出 gram 15 及 gram 14 兩個型號。兩個機型廠方都可以話落足心機設計，分別設有 15.6 吋及 14 吋 IPS 全高清屏幕，但兩機的重量都只得 980g ，相當輕巧。而兩部機都以鎂合金製作，耐用程度都算高。既然設有大屏幕，當然會用來看影片，除了以幼邊框設計之外，亦內置有閱讀模式及電影模式，可自動調節屏幕的亮度及色彩顯示。
部機變得輕巧，效能的表現又如何？ gram 14 及 gram 15 均設有 i5-6200U 處理器（2.30GHz），後者更提供 i7-6500U處理器（2.50GHz）以供選擇。而三個型號都可提供最高 8GB 記憶體，並內置有 256GB SSD 硬碟。設有 USB-C 插頭，可傳輸數據之外，亦可駁電視輸出 4K 影像，更可用作充電，不過想同一時間做齊三件事，就要用轉插先得。
LG gram 系列亦會採用DTS 音效系統，並內置 Cirrus Logic DAC（Digital Analog Converter），無論睇戲聽歌表現都不錯。此外，機體亦提供近似 Mac 機的隨開即用功能（Instant Booting），只要揭開 LG gram 便可由睡眠或休眠模式中啟動。售價方面， gram 14 為 $11,980，而gram 15（i5）則為 $12,980，最貴的gram 15 （i7）售價 $14,980。
