日本男星松本潤同「N年緋聞女友」井上真央呢對真係好慘，二人自05年因拍《流星花園》「被傳」拍拖後，外間一直都睇唔好佢哋，三日唔埋都話佢哋會散。近年可能見二人打風都打唔甩，就猛話女方好恨結婚，日日夜夜都迫男友KO件婚事，之後就吹話女方威脅若果近年仲唔結婚就分手喎。
日媒恨佢哋分手又真係恨到發燒，日前有報道就話，井上今個月起，將會離開有10年關係嘅事務所，直接影響係搞到佢哋結唔成婚！事緣井上舊東家「Seventh avenue」社長同松本潤嘅事務所Johnny事務所副社長喜多川Mary個女兒係好好朋友。而因SMAP解散風波下，喜多川Mary已經可以話喺日本藝能界度隻手遮天，井上呢次退會，據聞就係為咗同阿媽另組事務所自行接Job，（呢招係，等井上唔使畀咁多事務所抽成抽得咁勁，據知，有事務所可以癲到抽九成酬金），但此舉就令井上得罪咗舊東家，從而令喜多川Mary畀壓力松本潤，唔畀佢結婚唔再講，仲會封殺埋井上喎。
嘩！個關係咁複雜，真係咁都畀日娛諗到，真係唔知咩玩法。
來源：
