日本女星廣瀨鈴同佢家姐廣瀨愛麗絲，被傳不和已經講到爛，因此好多品牌都唔敢打兩姊妹主意，但呢個世界仲好多人唔識死，係都要搵呢對極品姊妹花打孖上。好似日本職籃B.LEAGUE就搵佢哋兩個做代言，日前仲為咗即將開League拍咗輯宣傳片，片中，兩姊妹要「隻抽」打半場。 廣瀨鈴
當然，受人二分四，緊係好專業，兩姊妹喺片中單挑時，非常認真同友善，片尾睇落仲好開心添。不過，細心啲睇，片中阿家姐着住條長褲加tee打波相當不文不類，但另一邊廂，阿妹短褲加小背心，已經贏咗幾條街。再講，阿妹其實由細到大都係運動健將，足球佢踢過校隊，又經常打籃球，所以片中經常見到阿妹表演球技，家姊係咁食塵，成條片唯一入波鏡頭都係阿妹包扮，明益到咁盡，比我係家姐，心入面肯定諗係咪玩嘢！？
來源：ModelPress
