日本女星 土屋太鳳 個樣雖然有番咁上下，但係講到身高，官方話只得155cm嘅土屋，肯肯定比其他女星輸足九條街，但係唔知點解，電視台、電影公司都好似好鍾意玩佢，選親啲男主角都高佢唔止一個頭，搞到拍埋去似兄妹多過戀人。最佳例子，就係今年佢孖福士蒼汰嗰套《 お迎えデス。 》（硬譯：來接你了），兩個主角身高相差近28cm咁多，搞到福士成套劇都「抬唔起頭」，收視緊係持續「痿縮」啦。
最近土屋新片《青空エール》（繹過：青空吶喊）上咗，有傳媒再次贈慶，挖番7月佢出席試映會嘅燶事嚟講，話說，當時一班演員都講緊拍攝時嘅趣事，男主角竹內涼真就失驚無神自爆，佢同土屋嘅身高差距「相當危險」，拍吻戲拍到似動作片咁，有幾次仲錯位錫咗落鼻哥度添，當時搞到土屋只有尷尬傻笑。
篇報道之後又再抄番土屋同山崎賢人段緋聞嚟講，話唔知點解佢孖山崎賢人做情侶時係無遺和感，但同親其他對手就出事，唔知係暗示山崎同係太矮，定係講土屋無咗山崎唔掂。不過有傳聞就指，土屋阿媽極之唔鍾意山崎，話佢配唔上佢個女喎。嗯……按今時今日嘅人氣，真係唔知邊個配唔上邊個喇。
來源：Cyzowoman
