「自殺」新經典西內瑪利亞爆緋聞玩死自己

日本女星西內瑪利亞，自從今年決心轉型，玩下健康性感後，終於叫有番啲人氣，起碼幾首新歌都獲得歌迷讚不俗，雖然有傳媒誇張到Tip佢係安室奈美恵接班人，但無可否認，都叫做令事業出現番啲啲啲曙光。不過，唔知佢係咪Shot咗，定真係有人有心「裝」佢，日前佢被拍到同模特兒呂敏「遊車河」，仲喪心病狂到主動啜爆對方。西內瑪利亞

可能，西內真係得罪人多，今日又有傳媒抄番呢單嘢嚟講不特止，仲翻抄佢上年又係同樣被人影到同《GTO》嘅演員城田優遊車河嘅舊文。報道入面，雖然無講到明，但就強烈咁暗示有人「多次」借「緋聞」嚟谷人氣搏見報。之後更加踩多兩腳話，以佢今時今日嘅「人氣」，大家都未必會關心，再加上近日整個日本傳媒都谷緊SMAP解散嘅內幕，又或者係20幾歲嘅靚仔高畑裕太，點樣性侵40幾歲嘅酒店服務員大嬸。若果真係有人借緋聞過橋，就明顯計錯數，時機錯晒；但若果係真拍拖，又顯得唔小心到太過低智。篇報導仲大大字咁以棒球運動員，好有信心咁揮空棒，最後要三振出局咁慘，真係聽完都想喊嗰隻。