夏天又是防水產品推出旺季，而沉寂一輪的 Nikon ，亦都有新機發布，型號為 COOLPIX W100 ，今次一改 Nikon 沉實的外型，改玩 cute 外型加多色選擇，都算幾有新鮮感。雖然香港仲未有價錢，不過睇外型玩味甚重，這部新機的價錢應該不會定得太高，如果可趕到暑假檔期上市，應該都有一班學生哥有興趣。
先講功能，這部同時具有 10 米防水、1.8 米耐跌、 -10 度耐寒及防塵的新機，是近期少見主打外型的四防機。至於拍攝能力，老實講並不高，首先是只使用同手機差不多的 1/3.1 吋感光元件，具有 1300 萬像素，而鏡頭亦只得 3 倍光學變焦（ 30 – 90mm ），而且由 30mm 起跳，最大光圈只有 F3.3 ，支援 1080p 影片拍攝，大部分規格都只能夠講比一部中階手機好少少。
不過，雖然現時不少手機都設有防水功能，但始終潛水屬遺失相機高危活動，拎住部手機落水，遺失了想搵都搵不到。反而如果定價可以在千多元，有四防玩潛，遺失了都不太肉痛。另外，COOLPIX W100 支援 Wi-Fi 及 藍牙傳輸功能，亦可遙控影相及傳相，除了有一貫的黑、白之外，仲有紅、黃、藍三種搶眼顏色選擇，更有特別航海花紋版本，在玩味十足下，或者都能夠吸引後生用家使用。
