山本舞香短髮Look成功搶鏡

近排啲日劇播得七七八八，電視台又係時候瘋狂咁谷新劇，所以藝能界新聞嚟嚟去去都講啲星去做新劇宣傳，於是乎日日都見到山崎賢人、桐谷美鈴同菜菜子，再唔係又傳下SMAP成員不和，你都咪話唔悶。山本舞香

日前，新生代女星山本舞香就接受咗間網媒嘅「挑戰」，將佢由小學六年級開始留嘅長髮剪去，更將過程拍成特輯公諸同好。原本以為都係碎料一單，點知啲宅男睇完，就猛讚佢清爽又可愛，誇張到以「天使」去形容。但究竟邊個係山本舞香？其實佢拍過幾套劇，都係做下啲配角仔，人哋阿妹嘅角色，講完都未必記得佢出現過嗰隻，咁又畀佢成功攝到位曝光，可見幾咁靜局。

不過，話又說回來，山本個短髮Look，睇睇下又幾似水著女星釋由美子嘅，若果連身材都似，真係宅男之福。