通常每年一次、每次都一大堆俾你睇，講緊唔係香港小姐或香港先生，而係電視機發布會，雖然每年推出多個型號，不過都總係要年中一次過大列陣式show晒出嚟先安心。而今次主打 Samsung SUHD 4K 電視，仲主打「量子點」顯示技術，咩係量子點？又比舊款靚幾多？下面慢慢話你知。
比納米更細
近年經常都聽到高端的 4K 投影機主打 HDR ，其實 HDR 簡單講就係暗位同光位可以顯示到更加多影像細節，而時好多電影，都已經推出特別 HDR 版本影碟，而播放器都已經支援，至於電視？有，樂視、Sony都有，至於今次 Samsung 的量子點技術，就是為提升 HDR 效果而設，其實所謂的量子點，就係用比納米更細的點，去顯示畫面，由於技術的點更細，令到可顯示顏色範圍都更大，由大部分的 8-bit（ 256 x256 x 256 = 1670萬種顏色） ，提高到 10-bit（ 1024 x 1024 x 1024 = 10 億種顏色）。
為 HDR 而設
或者你可能會話， 10-bit 同 8-bit ，肉眼係咪分到先？答案可以話你知一定分到！因為人眼最高可以睇到 24-bit 的顏色，10-bit 又點會睇唔到先，不過，最重要係連光度都增加埋，去到 1,000 nit 以上。吓？又拋數字出嚟？ OK ，簡單講就係將光度提高，配合埋量子點技術將細緻度提高，令到光位同暗位的細緻度更高，原本電視睇唔到的位，都可以輕易顯示到出嚟，配埋 HDR 碟睇，更加如虎添翼。
曲得更靚
而作為 Samsung 電視，主打當然係曲芒，以前曲芒中間位置都會較厚，不過今次 SUHD 電視就成塊都一樣薄。而為了加強機身的外型更靚，機背做全拉絲之餘，連散熱位都收埋，唔留意都睇唔到，而插頭位更加唔使講，最啱用電視間牆用。不過，如果普通座枱的話，佢個T型底座都幾大，不過買得咁大部電視，屋企都應該唔會細啦！
直接用 Tizen
大家都知 Samsung 係智能系統上，一向都鍾意玩另類，以前出過自家操作系統，至於電視，就愛用 Tizen ，而在今次新電視入面，都會用會新的 Tizen 系統，仲唔再同其他系統共用，所以一個介面，已經可以操控兼睇到你想要的資料，包括電視預覧圖，唔同 app 的最新推介等等，毋須轉來轉去。而預設 app 都算幾多。而最重要係支援 4K 串流優化功能，就算網絡唔夠穩定，令到畫質變差，都可以自己調校畫面，令你唔會睇到特然起格的畫面。
豐儉由人
至於定價方面，一開始都講過係大列陣，所以型號多到頭痛，簡單講係 SUHD 電視定價由 $13,980（ 49吋） 至 $299,980（ 88吋），而低一級無量子點技術的 UHD 電視，就由 $6,380（40吋）至 $25,980（ 65吋），價錢今次都算合理，分別在 5 月中至 7 月底之間上市。
