買得 DSLR 單反，好自然會考慮 C 記、N 記嘅機，至於現時都仍然有出機的 P 記（ 怕你真係唔記得，即係 Pentax ）真係無咩人會考慮，出街都只係好間唔中嘅間唔中，先見得到。被遺忘唔重要，最重要係識出新機，最近終於捨得推出旗下首部全片幅 DSLR 相機 Pentax K-1 ，淨機定價 $16,500 ，算唔算抵用？睇埋你就知。
五軸五級防震
作為頭炮，以過往經驗，都鍾意有幾多功能加幾多功能，首先感光元件採用 3640 萬像素，同價位全片幅 DSLR ，都可以行埋一邊。另外，會加入第二代相機防手震技術 SR II ，做到五軸防震加五級相片修正，比 OM 的五軸四級仲要多一級。而為了再提高相片質素，不設低通濾鏡是常識，但加入 AA （ Anti-Aliasing ）濾鏡模擬裝置，其實都想在不影響相片質素下，又可以減少摩願紋效果，認真貪心。
扎實有份量
講完感光元件 ， 到 Pentax K-1 機身 ， 手抦位同過往 DSLR 一樣，又大又突出，單手拎機非常穩陣。不過，快捷鍵差不多布點全個機身，就算專業相機都似乎多得有點過份，要記住都需要一段時間。值得一讚是機背多角度屏幕設計，以四條獨立金屬臂固定屏幕，點扭角度隨你喜好之餘，堅固度亦夠高。加上鎂合金機身，防水滴、防塵，戶外用都放心好多。
四合一變細緻
機身之後 ， 當然要提提相片質素 ， 其實今次亦都加入 Pixel Shift 像素移位解像系統功能 ， 聽完都毫無頭緒？主要是在同一時間拍攝四張相片 ， 然後將四張相的像素及顏色四併 ， 提升相片的細緻度同顏色更加靚 。 另外 ， 今次都加入動態修正功能 ， 由於四張相片中 ， 總會有物件移動 ， 當偵測到移動物件時 ， 就只會保留同位置第一張相影像 ， 而背景則繼續合併 ， 務求要靚之餘 ， 又能保持清晰。
每秒 4 張連拍
功能講完一大堆 ， 實際操作又如何 ？ 由於機身的快捷鍵好多 ， 一開始都幾不知所措 ， 經過十分鐘「 摸熟 」部機之後 ， 都開始上手 。 機身比之前 APS-C 相機重 ， 感覺不太膠 ， 堅固又夠實淨 。 對焦都算爽快 ， 不過一試連拍 ， 原來只得每秒 4 張 ， 有點失望 。 儲存格式有 RAW 同 DNG 兩種 ， DNG 屬影樓常用無損格式 ， 不過在下同影樓無緣 ， 作用都不大。
影星功能齊
內置影星軌功能 ，可 惜記招在日間舉行 ， 無得試 ， 但值得一讚的是將 GPS 快捷鍵放到機頂 ， 每次開關一個掣完成 ， 毋須入功能表慢慢搵 。 另外 ， 新增間隔拍攝同間隔拍片 ， 前者影星都好啱用 ， 後者可以將間隔相合成 4K 片 ， 慳埋後製工夫 ， 可惜間隔拍片時只會儲存片而不儲存相 ， 又要相又要片 ？ 影完相自己用電腦搞好過 。
總結 ： 功能同價錢成反比
論部機的功能 ， 老實講都算喜出望外 ， 最初睇到新聞稿賣 $16,500 ，以為一定賣貴 ， 但上手用落完全無偷工減料 ， 甚至呢個價 ， 出面要搵到同質素相機都唔易 。 只不過對好多人而言 ， 這部屬遲來的全片幅相機 ， 就算之前用開 Pentax 的老手 ， 好多都已經轉會 ， 至於用開 C 記、 N 記的用家 ， 又好難可以引埋身 ， 只能借用好多女仔同我講嗰句 ： 「 我哋 timing 唔啱！ 」 ， 不過遲到總好過無到嘅 。
試相
