玩多軸飛行器，最怕架機失控或失聯，跌落地面都算，萬一跌落水，電子零件同部相機即刻玩完。不過，Oakland University最近研發的多軸飛行器 Loon Copter 不單只可以玩航拍，仲可以飛埋入水，將螺旋槳變成推進器，潛完水之後又再浮上水面起飛，認真厲害，毋須擔心架機失控跌落海。
Loon Copter 其實只是一個proof of concept成品，研究小隊只是用來證明水陸兩用飛行器的可行性，現階段距離投產仲有一段時間，將來仲要解決好多問題，包括水底的遙控接收距離，水底導航、潛水效能等等，想知道最新狀況，就要留意研究小隊的網站喇。
