近年好多人都玩 Action Cam ，在人有我有的心態下，好多都買部「山狗」旁身，但如果想等同當相機用，就一定唔會，始終影相可能連手機都不如！不過，最近 Casio 推出第二代的 Action Cam ，型號為 EX-FR100 ，有齊 Action Cam 的元素之餘，仲加入埋不少相機功能，少有專影運動之外，仲可以影其他相的 Action Cam 。
外型：分別不大
如果講到外型，其實都同上一代可以話九成相似，如果兩部機離遠睇，相信都幾難分得清。原因無他，始終上一代的分體設計又認真幾好用，如果想輕只要拆下屏幕拎住鏡頭就可以影相，又或者拍攝難搞角度，都可以用鏡頭就住再睇住個屏幕構圖，所以今次無變外形，都無可厚非。
鏡頭：16mm廣角
至於 Action Cam 最重要元素──鏡頭方面，就由上一代的 21mm 變成16mm ，雖然仍然不設光學變焦，不過由於鏡頭更加廣寬，除了影運動時構圖更靚之外，更可以方便玩群拍。加上鏡頭設計對距焦離為 10cm 至無限遠，無得玩淺景深但影相永無 out focus 。不過，可能今次新機為減低成本，所以解像度上亦由之前的 1400 萬像素下降至 1020 萬像素，同現時不少相機比，解像度仍然有段距離。
影片：240 fps慢動作
為加強拍攝功能， EX-FR100 採用最新的 EXILIM Engine HS Ver.3 雙核心處理器，由於加快影像處理，所以除了具有 30fps 連拍功能之外，亦可做到 240fps 的慢動作影片。另外，亦加入全新的影片防手震功能，除了垂直、水平防震之外，更可做到旋轉防震（近似於 OM 的五軸防震功能）。
操作：都算順手
Action Cam 最重要影相拍片夠簡單， EX-FR100 又算不算合格？同上一代一樣，鏡頭及屏幕都分別設有獨立的影相鍵及拍片鍵，急需使用一按即可。而影相設定方面，亦靠觸控式屏幕完成。相比手機屏幕， EX-FR100 的屏幕反應略兼有點慢，不過仍算可以接受。反而介面操作上不太直觀，用家需要點時間適應。
拍攝模式：應有盡有
由於 EX-FR100 的定位是同時做到 Action Cam 及相機，所以拍攝模式都算多，除了有運動專用的單車、滑雪與水上活動、健行等，亦具有專業進階拍攝模式自動使用最適合的設定拍攝，而最重要是設有 Casio 的美顏模式，玩自拍都無問題。作為一部 Action Cam 來講，模式之多都應該算是少見。
總結：價錢更低，抵玩度更高
作為一部同時具有 Action Cam 又可以有限度地當成相機用的產品，定價四千有找，的確吸引力更高。不過，如果主打女性自拍，似乎 EX-FR100 的超廣角自拍未必最是最好選擇，反而鍾意影風景、群拍的人，會更加值得考慮。
試相
