〔金仔韓遊〕仲去東大門比人劏？改去地下街掃平貨

去得韓國玩，除了因為有美食，購物都是一大元素，而去買衫，更加是女士們的指定動作！而以前，通常都會去做批發的東大門買，夠平又多選擇，但時至今日，東大門做批發已經少之有少，大部分都變做零售，而且店主都愈做愈精，由以前明碼實價，變成現在全無標價，再睇人開價。想買平衫，可以點？仲有另一個地點──高速巴士客運站！

其實這個高速巴士客運站，是首爾地鐵線其中一個站名，同時亦都是韓國五大購物地下街之一，只要一出站，目視最少有三條購物街可以行，而要行完一條，差不多都花兩、三個鐘（已經不算睇得多嗰種）。至於貨物種類都幾多，由衣服、鞋襪、化妝品、袋、玩具、飾物全部都有齊，最重要明碼實價之餘，價錢拍得住以前的東大門！點可以錯過！

〔金仔韓遊〕仲去東大門比人劏？改去地下街掃平貨 — 每隔幾間鋪就會有地圖，指示你位置。

由於時間有限，所以今次主力介紹的是由 8 號出口的地下街，這條地下街的特點是夠新，行落特別舒服，同時行幾步就有地圖提供，一定不會迷路。至於在中間位置有大量坐椅，作為會合點最適合不過。

至於出售的物品，主要以女性衣服為主，每間鋪的主題都幾鮮明。由於小編是九月去，所以好多衫都做減價， 5,000won（約 $33 ）、 10000won（約 $65 ）的女裝隨處可見，而且不同年齡層的人都一定啱。

除了衫之外，值得推介的還有袋，不單是女裝袋，就算男裝背囊都好抵買，大約 10000 至 20000won（約 $65 至 $131 ）就買到，款式都幾似近年潮興某個熱賣款。至於男裝方面，就比較少，不過都會搵到平衫買，大約 10000won（約 $65 ）起，相比東大門買件 Tee 都差不多要兩、三萬 won ，又可以慳一筆。