美國 Georgia Rockdale 縣執法部門有個習慣，就係會喺 Facebook 專頁貼出10 個在逃疑犯嘅資料，表示佢哋係現時警局嘅 Most Wanted List，上得榜嘅，通常都係同命案劫案綁架嘅罪行有關，而當局就希望透過社交平台可以收集到相關資訊，令佢哋可以緝拿罪犯歸案。而就喺早前一次最新排名榜中，唔知係咪唔滿意自己榜上無名，有一個名叫 Christopher Spaulding 嘅人留言話：「How about me？」
當地警方喺查實資料後，好快咁喺社交平台回應留言，指對方的確有兩項通緝令喺身，仲話已經出動緊。相隔一日，當局發布咗新帖文，相入面有一個著住紅色衛衣同戴住紅冷帽嘅人被鎖上手釦，而帖文就好感謝 Spaulding 協助今次緝捕行動，並解釋話排行榜其實只係根據罪行嚴重程度而列出，對於無上榜人士，唔代表警方放棄追捕。呢個帖文都係唔錯嘅反應，首先係 Spaulding 嘅留言獲得 400 個互動，美國警方嘅更新帖文更有 1400 個互動及 1700 個分享，隨時破晒專頁嘅紀錄。有眼利網民仲發現到 Spaulding 被捕時嘅衫帽同 Facebook profile 相一模一樣，話今次警方真係直接由 profile 相拉個人歸案，又有人話應該係佢嘅相同打扮，減輕咗警方搵人嘅工作負擔。
今次呢件事件，相信 Facebook 方面都提供咗唔少資訊，再加上電訊商配合，先可以咁快掌握疑犯位置。當然今次都唔係特別事件，執法機關透過社交平台追捕疑犯嘅事件時有發生，例如英國警方喺調查一個疑犯發布嘅天堂享樂生活貼文時掌握到佢嘅位置，意大利一個黑社會成員因認唔出喺 YouTube 分享烹飪片段時，雖然無出樣，但憑手上一個紋身圖案亦被警方認出，真係唔好亂咁喺社交平台發文喇。
