企業最怕成為網絡攻擊嘅目標，因為就算點做足安全保護都好，有時好多因素都會導致漏洞出現，例如員工唔小心外洩咗公司帳戶資料、第三方服務商俾黑客入侵……都有機會令犯罪集團入侵公司。 InsecureWeb 提供嘅暗網監測服務，或者可以幫企業管理者減減壓。
InsecureWeb 提供嘅監測服務內容，係會利用爬蟲器穿梭於各大暗網、地下討論區等網絡罪犯進行交易嘅地方，搜尋客戶及其員工嘅公司帳戶、電話等資料有無涉及喺外洩事故當中，又或公司名有無被人提及，一旦發現呢啲資料，就有好大機會顯示客戶被攻擊嘅風險大增，犯罪集團有機會利用呢啲資料直入侵公司網絡，以及向員工發動釣魚攻擊，造成公司各種損失。InsecureWeb 會將所有安全狀況上載去客戶嘅獨立帳戶頁面，客戶可經 Chrome 及 Firefox 等瀏覽器隨時登入查詢。
要享用以上服務，企業客戶就必須向InsecureWeb 提供多項公司資料，包括電郵位址、最多三個用戶嘅名稱、公司電話、個人電郵地址等，讓爬蟲獲得足夠嘅資訊，先可以喺上述地方更容易搵到同客戶有關嘅資料。呢項服務月費由 39.99 美元起，視乎客戶需求，將會按選擇內容收費。
