賞金獵人平台 HackerOne 早幾日發出聲明，指發現有新入職員工私下將平台會員上傳嘅安全漏洞報告據為己用，再將報告提交存在漏洞嘅公司，以free rider 模式賺取賞金，如果唔係有客戶發現重複收到類似安全報告，先至揭發呢次事件，否則呢個員工應該仲可以賺多幾轉錢。
HackerOne 呢個全球最大嘅網絡安全賞金獵人平台成立於 2011 年，原名為 Hack100，創辦人 Jobert Abma 及Michiel Prins 係荷蘭黑客，佢哋嘅目標係要搵出全球100強科技公司嘅安全漏洞。HackerOne 成立近五年，旗下黑客所獲取嘅賞金只得二千萬美元，但單在 2019 年已獲得四千萬美元！一來與平台合作嘅企業愈來愈多，例如 Facebook、Microsoft、Sony、Uber 等，至今已超過 1,700 間，其次係加盟嘅黑客亦爆發式增長，現時已登記嘅黑客已多達 60 萬，同時來自全球170個地區，成為一個龐大嘅網絡安全專家網絡。
不過，今次呢粒老鼠屎就令到 HackerOne 平台失信受影響嘅會員，根據平台發言人所講，早前佢哋接到一個同平台合作嘅企業客戶報告，指收到兩份舉報相同漏洞嘅報告，本來發現相同漏洞嘅情況經常發生，但由於呢兩個報告嘅內容非常相似，所以先令客戶產生懷疑。經調查後，HackerOne 發現原來同一個入職兩個幾月嘅員工有關，呢個員工私下攞咗平台會員上載嘅安全漏洞報告，稍為修改內容後，就將報告提交俾受漏洞影響嘅公司，經對方確認後，仲因此獲得漏洞賞金，幾乎零成本將賞金袋袋平安。HackerOne 已解僱咗呢個員工，同時了解咗呢個員工在職期間接觸過嘅報告，並通知咗受影響嘅平台會員，保證事件唔會再發生咁話。
