唔少人而家都會靠 YouTube 頻道發布短片，甚至會靠 YouTube 賺取點擊費，而一款叫做 YTStealer 嘅惡意軟件就專門瞄準 YouTube 創作者攻擊，為咗令目標人物更易上當，網絡犯罪集團會將惡意軟件隱藏喺免費影片編輯工具入面，又或其他連線遊戲嘅破解工具內，只要受害者安裝咗呢啲虛假軟件，犯罪集團就可以偷取收藏喺瀏覽器內嘅登入 token，就算受害者有啟用多重因素驗證（MFA）功能，只要仲未登出帳戶，一樣會俾對方偷用到。雖然保持登入狀態係好方便，但如果擔心苦心經營嘅頻道俾人騎劫，都係養成每次登出嘅良好習慣好啲。
網絡安全公司 Intezer 發表最新報告，指佢哋嘅專家捕捉到一款新嘅惡意軟件 YTStealer，呢款軟件會假扮成影片編輯軟件例如 Adobe Premiere Pro、Filmora、FL Studio 等等，吸引 YouTube 創作者下載使用。另外，由於有部分 YouTube 創作者係靠直播或講 game 搵食，所以犯罪集團亦會假扮成一啲出名嘅連線遊戲如 Grand Theft Auto V、Counter Strike GO 或 Call of Duty 嘅出術工具，又或係 Roblox 破解版等，提高俾人下載嘅機會。
專家解釋，一旦有受害者安裝咗軟件，YTStealer 就會自動搜尋及驗證儲存喺瀏覽器內嘅 session 登入驗證，如發現仲用到，軟件就會自動讀取 YouTube 帳戶嘅資料，睇吓究竟有幾多人訂閱及收入狀況。專家相信對方攞咗呢啲資料後，就會放上暗網發售，呢啲資料非常受歡迎，因為如果頻道有好多人訂閱及追蹤，潛在賣家就可以利用佢嚟發放虛假資訊，例如鼓勵訂閱者購買加密貨幣，又或下載一啲有用軟件，訂閱者亦有可能會照做，擴大感染範圍。專家建議 YouTube 創作者如果唔想苦心經營嘅帳戶俾人搶走或用嚟呃粉絲，就要記得每次用完帳戶都要登出，令 session 登入驗證作廢，就可防止帳戶被盜用。
