正所謂有錢齊齊搵，部分網絡犯罪集團都唔介意共用網絡攻擊資源，最新合作嘅係 FluBot 及 Medusa 兩隻 Android銀行木馬 程式，荷蘭網絡安全公司 ThreatFabric 研究員指出兩個集團唔單只採用相同嘅 SＭishing（SMS phishing）感染渠道，就連假扮成正版軟件嘅名、安裝套件及 icon 亦一模一樣，估計雙方正在共有資源。
近年有部分網絡犯罪集團都有進行合作，例如木馬程式 Trickbot 就曾夥拍多個犯罪集團，包括行家 Emotet，以及勒索軟件集團 Ryuk、Conti 及 Diavol 等等，特別係 Emotet 自從被國際刑警搗破後，喺上年 11 月回歸時更倚賴 Trickbot 嘅感染渠道重生，可見集團與集團之間並唔係完全互相排斥。ThreatFabric 研究員喺最新發表嘅研究報告就提到，有跡象顯示 FluBot 及 Medusa 亦開始合作，利用相同技術及方法感染 Android 手機用戶，例如假扮成 DHL 或 Flash Player 應用軟件或更新檔等，只要用戶稍一不慎賦允所要求嘅安裝權限，手機內嘅私隱便會失守。
Android銀行木馬演進
睇返兩隻木馬病毒嘅往績，FluBot 係近年一隻比較積極嘅木馬病毒，佢嘅功能不斷演進，其中一個厲害嘅地方係佢可以攔截及修改用戶收到嘅通知訊息，並善用所取得嘅自動回覆權限，將惡意連結經用戶嘅 WhatsApp 發送至聯絡清單上嘅親友，擴大感染範圍。
而 Medusa 於 2020 年 7 月首次被發現針對土耳其金融機構攻擊，現時 Medusa 嘅業務更拓展至加拿大及美國。喺病毒成功入侵手機後，佢會濫於所取得嘅應用權限，進行鍵盤記錄、存取事件記錄、拍片收音等功能，同時更可暗中進行金錢轉帳。而喺共用資源後，兩者嘅攻擊特性似乎未有互相取長補短，純粹係 Medusa 借用 FluBot 感染途徑，不過最終仲會有乜動作，就要留意日後發展。
