網絡安全公司 AhnLab ASEC 一份安全報告指出，使用瀏覽器儲密碼非常危險，因為一款專門用於盜取密碼嘅惡意軟件 RedLine Stealer ，只要成功感染電腦設備，就可以用嚟盜取 Chromium 瀏覽器內儲存嘅帳戶登入資料，包括 Google Chrome、MicrosoftEdge 及 Opera 等。最理想嘅方法係採用專門嘅密碼管理器，喺有需要時先用主密碼登入，再喺入面取出相關帳戶登入資料，而且亦要為所有帳戶啟用雙重（2FA）或多重因素驗證（MFA）功能，咁先可以減少帳戶被入侵嘅風險。
安全專家喺報告入面指出，RedLine Stealer 係一款僅售 200 美元嘅惡意軟件，佢哋有一個客戶就係俾佢偷咗公司嘅 VPN 帳戶登入資料，然後喺三個月後被入侵公司網絡。雖然呢個客戶已經安裝咗網絡安全軟件，但仍然遭受感染，同時亦未能偵測及移除到佢。專家解釋，RedLine Stealer 主要係透過引誘目標對象打開含有惡意指令嘅 Excel 檔案，先至進一步將主程式下載至電腦，係現時惡意軟件避開防毒軟件攔截嘅主流技術。而喺入侵後，佢就會搜尋 Chromium 瀏覽器用嚟儲存帳戶登入資料嘅 Login Data 檔案，咁就可以一次過偷晒所有資料。
專用程式取代瀏覽器儲密碼
專家話就算用戶唔授權瀏覽器儲低帳戶登入資料，瀏覽器本身都會將相關網站儲存喺黑名單上，所以黑客某程度上都知道用戶有啲乜嘢戶口，如果用戶習慣一組登入資料應用喺唔同帳戶上，咁黑客就會將手頭上攞到嘅帳戶資料，用嚟嘗試登入其他帳戶，一樣都唔多安全，所以就奉勸大家唔好儲密碼喺瀏覽器上，同埋做足以上安全措施咁話，例如使用密碼管理應用軟件。
