最新一集《 蜘蛛俠：不戰無歸 》喺香港上映短短兩周，票房已經破億，如果早前未睇，喺新一輪防疫政策下，戲院全部關閉，唔知大家又有無諗過用其他方法去睇呢？網絡安全公司 ReasonLabs 專家都了解到全球仲有好多人想喺「屋企」睇，不過呢種做法除咗係違法之外，透過 BT 下載盜版電影，對網民亦存在極高風險，因為研究團隊發現，有網絡犯罪集團火速製作出加密貨幣 Monero 嘅 挖礦軟件 ，假扮成新一集蜘蛛俠嘅 torrent 檔案，然後放上不同討論區等目標自己中招。電腦一旦被感染，挖礦軟件就盜用電腦嘅運算資源嚟挖礦，用戶唔單只會發現電腦行得慢咗，仲有機會慢到用唔到添！
安全專家解釋，呢款 Monero 挖礦軟件會假扮成 BT 種子，但下載後最會發現到佢係一個 exe 執行檔，所以其實好易發現到可疑之處。Monero miner 暫時仲未被加入病毒資料庫，網上惡意軟件記錄庫 Virus Total 同樣未有佢嘅病毒樣本。當 佢喺入侵電腦後，會自動喺Windows Defender 內加設一個免檢規則，等佢可以長期喺電腦內生存，真正可以話係「易請難送」，中咗好難返轉頭。
