雖然今次 Apple 新推出的兩部 iPhone ，都被外媒指新意欠奉，不過對於果農來說，新意高低不重要，反而是價位高低，甚至仲有無水位。在今次發布會中，Apple 只有一句「雙卡雙待只在中國」，咁究竟香港的 iPhone 有無雙卡雙待？唔通到時大陸炒返高價嚟香港？其實細心留意下香港規格表，就會睇到邊部行真雙卡，亦都即刻明晒聽日應該入手邊部！
聽日下午準時 3 點預訂新機，老實講如果港版無雙卡雙待，就真係好難炒，始終唔少大陸人都用慣雙卡雙待機，要轉用部單卡機，不如等大陸買。既然如此，究竟香港批機又有無雙卡雙待？答案可以好實在話你知：有！不過只得 XS MAX 一部有！點解咁肯定？其實留意香港個規格表就知，一拉落去， XS 一項就講明插一張卡加上 eSIM ，而 XS MAX 就寫明係雙卡雙待，果然 Apple 都當香港係中國嘅一部份！
雖然知道邊部機有雙卡就好易知聽日目標訂邊部，不過，老實講就算有，都只係中港兩地規格平等，唔代表一定需求高，唔使問先達都可以答你，過往經驗頭一個星期都一定執到錢，兩個星期好大機會執到錢，第三、四星期就睇下需求大唔大先知執唔執到錢，過一個月後，就打定輸量賺飛行里數好過。至於幾萬蚊一部收機，除非開賣第一日到手，否則發夢諗下就算。
