Samsung 電視畫質一向都不錯，亦有不少家庭考慮入手，但你又有無諗過，去戲院睇戲時，都會睇到 Samsung 的屏幕？最近沙田新城市廣場的全新戲院 MOVIE TOWN ，就成為首間 Onyx Cinema LED 屏幕影院，成為繼首爾、上海和荷里活之後，全球第七間配備Onyx Cinema LED 屏幕的戲院，或者都算是一個賣點。
Samsung Onyx Cinema LED 支援高動態範圍（HDR）影片和提供無限對比度，並具快速反應時間，在播放高速動作畫面時，亦能提供清晰、富動感的電影內容，減少了動作模糊的情況。由於Onyx Cinema LED 不受外在環境光線影響，簡單講就是開到燈光火猛睇，畫面都一樣咁光。而 4K 影像是業界首個獲得數碼電影聯盟（Digital Cinema Initiatives ，簡稱DCI）認證的戲院屏幕。
當然，作為影迷，有個更靚的屏幕睇戲固之然好開心，但睇戲好多時講氣氛，在全黑環境中拍住拖睇戲，就係其中一個重點。另外，如果畫面太細緻，反而又無睇戲的自然感覺，究竟你又會不會 buy ？都要睇過先可以下定論。
