還記得早兩年， ASUS 推出首部潛望式光學變焦鏡頭手機 ZenFone Zoom，但後勁不繼，一直都無第二部光學變焦手機推出（嗱，講明先，唔計雙鏡頭啊！）。最近國內品牌 OPPO 就拎返個技術出來用，在 MWC 展示 5 倍光學變焦鏡頭技術。老實講，用家可能好興奮，但至於興唔興得起，就真係好睇品牌， ASUS 有版你睇！
雖然各大傳媒見到五倍變焦，都覺得好似好新，但其實技術舊到牙都甩，只係因為唔想手機連 DC 都玩死埋，所以一直無人用。不過， Oppo 的技術都同 ASUS 有少少唔同，因為會加入雙鏡設計，潛望式鏡頭同 ASUS 一樣會繼續具有三倍變焦，而另一個鏡頭就用廣角鏡頭彌補，再用返雙鏡的技術，夾夾埋埋拼拼貼貼咁，就做到 5 倍光學變焦囉。你問咁算唔算呃你？當 iPhone 7 都咁玩啦，你唔係唔信 iPhone 啊！
另外，當然亦都會有防手震功能，不過今次會直接用在潛望式鏡頭上，以減低遠攝下的手震問題，其防手震精確度更高，尤其是五倍變焦的情況之下。而為了迎合手機要薄的要求，全個 5 倍變焦組件只厚 5.7mm 。雖然 OPPO 已經晉升為全球第四大手機品牌，但它的手機，你又會不會買？
