日本女團AKB48成員島崎遙香，Hea做出晒名，媒體將佢回答任何記者、Fans嘅極差態度，改咗個名做「鹽對應」，難得佢真係無有識死，次次講親嘢都「有嗰句講嗰句」，尤其最唔啱聽嗰句都要講埋，好似前排宣傳新劇竟然話好想離隊去閃婚。卒之事務所還佢心願，安排佢上一個除夕夜畢業。
噚晚電視台就播埋佢嘅「遺作」《キャバすか学園》（中譯：陪酒須加學園），島崎遥香就跟大隊飾演陪酒女郎，不過唔知係咪編劇有心玩佢，定係要切合佢性格，角色充滿「鹽神」影子，即係點？即係串串貢同Hea做囉，唔係賣笑兼無事業線露，只係擺下Pose同飲下紅酒就……玩完。
不過，島崎遥香現身AKB嘅「馬些路」系列都唔係第一次，但次次都係扮型同無乜對白，班AKB粉應該見慣不怪。反而讚佢幾可愛添。
來源：ModelPress
