為翻身搏到盡能年玲奈九唔搭八出寫真

日本女星能年玲奈，同事務所鬧翻嘅瓜葛講到口都爛，總之佢被人封殺咗兩年有多，幾經辛苦終於改名のん再戰藝能界，可惜搞咗咁耐，都係得為動畫電影《この世界の片隅に》（唔繹，反正都唔會有興趣睇）聲演女主角咁多多。

能年當然唔甘心咁坐以待斃，早前佢就去咗電影講嘅廣島，拍咗輯寫真，仲以《のん、呉へ。2泊3日の旅～『この世界の片隅に』すずがいた場所～》為名推出寫真集，擺到明向食正電影條水。日前，佢就發咗幾張寫真相出嚟，當然同電影嗰種淡淡哀怨係無關，相入面仲一味Sell能年天真可愛陽光燦爛。不過，撇除佢「掛羊頭賣狗肉」嘅書名，由新進攝影師北浦敦子操刀呢本寫真集，當攝影Reference用已經值回票價。