萬眾期待！日本女神新垣結衣曾話過喺新劇《逃げるは恥だが役に立つ》（逃避雖可恥但有用）會大解放，講就講咗五集有多，噚晚……噚晚嘅第六集終於等到喇！今集劇組硬插，結衣BB無啦啦要同男主角星野源去溫泉旅行！咁唔使多講終於有嘢發生喇！
劇情有咩發生就自己睇，總結嚟講，就係有齊水手服、浴衣、地板咚、男上女下、「床戲」同咀嘴，結衣BB入浴仲騷埋香肩！咩話？露香肩唔夠？喂，你追緊嗰個叫新垣結衣，唔係叫新垣AV呀。
今集劇情咁爆破，收視自然勁到爆，已經升到13.6%新高點，繼續騎住石原里美套《校對女王》，但估唔到，班劇迷都唔多收貨，不停咁話：「星野源你唔係人」、「星野源必須死」，但有啲就反而話：「星野源沒關係」劇情評價咁大反差，事關劇入面，咁大個結衣BB用咗成集投懷送抱、半賣半送，都目不邪視，扮晒正人君子，只係最尾就鏡頭下錫咗女方一啖咁多！令人懷疑佢唔係男人都多餘，超人都企唔定啦係咪？日媒更以「日本で一番童貞男」嚟形容佢！
咦？劇透咗？對唔住，Sor9y囉。
