日本女星香里奈，前年無啦啦被雜誌登咗輯喺屋企着底底瞓覺嘅不雅照，搞到人氣跌得快過跳樓，隔咗成年「復出」拍劇都唔多掂，連佢間事務所都嗌晒救命。可能見公司無乜起色，同公司嘅性感尤物石川戀，月初就宣佈「移藉」去另一間公司，佢仲喺網誌度話轉會後想向演員方向發展，仲話希望可以有新開始。
日前，有日媒就拎呢單嘢再鞭多香里奈兩鑊，話石川戀出道時，人氣持續咁暢旺，影、視同Model三瓣都急速上位中，可惜香里奈搞單咁嘅嘢，連累有「香里奈接班人」之稱嘅石川喎。報導又預計，石川過檔後，會收起過往嘅性感，諸如以往好似同福山激咀嘅畫面可能永遠唔再出現，仲叫各位宅男同定石川嘅D Cup上圍同「美尻」Say Goodbye咁話喎。
當然，個報導最終都補咗句：「美尻封印には絶対に反対」（睇字面都唔使繹啦），但係報導好明顯無計過，石川戀拍《奇蹟補習社》上位時，香里奈輯閃卡已經傳到街知巷聞，所以報導主要都係想將呢個「國仇家恨」，要香里奈食晒。
我都係返出去睇番幾張舊相先……
