日本女星土屋太鳳，雖然五短身材，但憑住個樣甜美同被喻為「絕世隱乳」嘅稱號，令佢喺藝能界發展都算唔錯。再加上早前，佢出席TBS全明星運動會時，喪跑疾走馬拉松後，企都企唔穩都要幫新劇《IQ246～華麗なる事件簿～》宣傳，感動到全個劇組眼濕濕，搞到日媒瘋狂咁讚佢專業。
日前，又有報導開名狂讚佢，搵咗好多「消息人士」同「電視台工作人員」，讚佢拍親劇都好有專業操守同好有禮貌，例如，拍《Orange》時，試過落雨天幫全個劇組拎晒遮之餘，拍完外景仲會幫手整番乾淨借返嚟嘅Coffe Shop，因為咁，山崎賢人先咁冧佢喎。
最近拍《IQ246》時，土屋不單只親手下廚請食嘢之餘，連作為道具嘅劇中食物，都幫手整熱佢，等拍攝時啲飯餸影落仲熱騰騰。誇張到，有「藝能記者」（即娛記），話佢連寫官方Blog都敬業過人，經常Update之餘，每次都發過千字嘅千字文。
總括咁講，都係想解釋點解土屋太鳳得五呎一多啲啲啲，電視台都咁鍾意畀機會佢嘅原因。
都係嗰句：雞脾打人牙骹軟。
