日本天團SMAP自從宣佈年底正式解散後，各大傳媒日呎夜吹「分手」原因，不過眾說紛紜中，大多傾向於對上次鬧解散時，木村做咗二五仔嗌留低，搞到成Team人都唔Like佢一個，最佳證據就係，嚟緊木村打算開新劇，講咗幾個月，都傳所有女星都推晒唔肯接。
不過，寫咗咁多個月，真係寫到墨水都盡嘅時候，日前終於有新料要爆喇！香取慎吾忽然宣佈，喺明年9月同事務所完約後，會全面喺藝能界引退。至於，引退原因就沒有明言。咁傳媒緊係立即癲咗咁，將所有罪過射落木村度，啲「消息人士」、「身邊人」、「藝能界相關者」及「前電視台職員」更加係走出嚟講，香取引退原因，係同「叛徒」唔妥到出晒面，唔想同佢合作到一個點，甚至連見到佢都唔想，所以滿約就索性引退唔Do咁話喎。
下？若果真係咁嘅原因，睇怕佢哋個仇口仲大過「殺父之仇、奪妻之恨」喎。
來源：Yahoo Japan
