玩開模型都知， Bandai 出嘅 Metal Build 高達模型，雖然隻隻都開價上千，但憑超合金物料製作，同埋佢無得頂嘅可動性，出親都大把人買。早前， Bandai 自己打破咗 Metal Build 唔出 UC 年代機款嘅潛規則，宣佈嚟緊明年 3 月出 F91 ，仲由大河原邦男設計，令到好多電車男都「又怕又期待」，好多口痕友仲話唔方好，分分鐘罷買添。不過直至上個禮拜喺秋葉源搞嘅 Tamashii nation 2016 ，官方就展出咗個 Dummy 後，成班反對派立即收晒聲，有啲仲轉軚「買買買」添。
不過，若果死都要拗 F91 唔係你杯茶，都唔緊要，事關官方網站 gundam.info 就搞咗個網上票選，喺 9 隻 UC 高達中，選出心水 Metal Build 愛機。你一定會問，選完又係官方玩黑箱作業，咁就大錯特錯，事關，Bandai一向都好順應民意，之前就選過心目中下一隻 Ka. signature 嘅高達，結果由 ZZ gundam FA 奪冠，點知官方痴線到一個星期唔夠，就立即開咗個模，順便喺 Tamashii nation 2016 展出埋。所以若果有心水，記得去投票，到時出咗有無錢買就另計。
