仲有兩個月就到聖誕節，時間過得快到你不信，作為男朋友，當然要開考慮一下送禮問題，頸鍊、手鍊送到悶，只送花亦都隨時俾人閙，仲有什麼選擇？最近 Gc (Swiss Precision by GUESS) 就推出新系列，今次專攻女性的 Gc LadyBelle ，加入不少女性都鍾意萬花筒花紋珍珠貝母面錶盤，亦都有玫瑰金數字，加埋 GUESS 個名，加埋一齊，只要你女朋友並非拜金女，戴手錶都要幾皮先會戴，都一定會受落。
除了錶心，皮帶都有不少選擇，包括受到 70 年代流行的拼縫風格啟發，走抽象設計路線，以秋冬的流行色彩—啡色及紫紅色作主調，配上幻變的蛇紋皮製錶帶。其次是啡色與米黃色的拼湊圖紋錶盤配襯玫瑰金色的羅馬數字刻度及啡黃色幻變蛇紋皮製錶帶，感覺會較為成熟前衛;至於紫紅色迎合秋冬大熱的潮流趨勢，設計創新華麗，配上銀色刻度和蛇紋皮製錶帶，平實之中帶點不平凡。
