戀情曝光被嘲假面 AV女明日花綺羅有排黑

日本AV女優明日花綺羅（明日花キララ），長期都高據女優排名榜十大，名氣都不知超越幾多奀星。今日，佢就忽然被雜誌《週刊女性》踢爆，同咗組合「Hey! Say! JUMP」男星伊野尾慧同遊新加坡，仲喺酒店泳池度「肉帛相見」咁談心。消息傳出後，老實講，反應都幾冷淡，事關男方人氣……記得佢都係因為佢係「新．金田一」山田涼介嘅隊友，而隊男團因為SMAP解散，所以傳媒先拎嚟講下、「猜測下」會唔會係下一隊SMAP係咁多。

再講，睇番男方啲相，佢個樣靚唔靚仔唔使見仁見智，事關佢隊男團「Hey! Say! JUMP」出晒名玩童顏，23歲嘅山田涼介扮初中生都有人信，而作為佢嘅隊友嘅伊野尾慧就更加之極致，小學生嘅樣貌加Fit到成身肌肉又真係幾有遺和感。

既然男、女雙方都無乜嘢好講，咁又有乜好講？結果有傳媒就將焦點放喺明日花個胸……唔係，係個樣度，有報道話，AV界整容隆胸已經非常家常之便飯，明日花個胸有無整過唔使多講，個樣近年仲嚴重「佐野鄒子」化，今日難得明日花出席活動，有記者唔追問佢緋聞追問佢點睇「佐野鄒子化」，佢竟然話唔識邊個叫佐野鄒子！咁又係，當初新版《死神筆記》開拍時，好多粉絲都話佐野鄒子係劣版MISA MISA，仲嘲笑佢得個胸，明日花唔認似對方都好情有可原。