日本女星相武紗季，雖然唔算紅到上女神級，但憑住甜美嘅笑容，再加上間唔中出下水著寫真，都冧到唔小少男，今年五月佢忽然同化妝品社長閃婚，都唔知傷咗幾多宅男嘅心。
可惜唔知係咪個婚訊嚟得太急，定係有人有心裝佢。佢公布婚訊唔夠幾日，就有傳媒踢爆佢老公係黑幫份子，直情話佢嫁入假.豪門。不過，相武都一於懶理，傳下傳下就無咗件事。但相武可能真係得罪人多，前日有傳媒又抄番單嘢出嚟講，今次話佢老爺原來係九洲傳說中暴力集團嘅成員，6年前仲涉嫌打過藝人市川海老藏，海老藏係邊個唔係重點，個重點就係話，相武經過4個月深思熟慮下，決定「展開」離婚計劃，報道仲話，現時二人已經分居。不過，篇報道一張相都無，當事人又無回應，由始至終連社長老公相都無見過。衰啲講句，而家話相武被人溶咗都可能有人信。
來源：東スポWEb
