你無睇錯，我無打錯，若果你近排日日芒住個網等買iPhone，目的只係為咗賺一百幾十，咁就要留意下以下資訊，只係花十零分鐘，或者令你有另外選擇去執少少。 Jordan Air
點解唔買nmd？
首先，你會問，近年人人都講nmd，究竟Jordan有咩吸引力？其實了解過nmd玩法，就知玩唔過，事關要原價入手nmd，先要去Adidas專門店買滿2000元成為VIP，之後就要喺指定時間、去指定店舖排隊登記，先有一個抽獎機會，抽到再要對身份證、VIP卡號先可以入手，完全係未見官先打三十大板，你話諗唔諗得過先？
Jordan「市場」有幾大？
要知個炒價市場有幾大，就要先講nike嘅玩法。因為但凡有復刻、特別版Jordan出，香港全部都只得官方網站有得率先賣，只需要去登記成為會員，就有資格去買。online買又分兩種，其中一種就係官方喺無通知情況下，突然於星期四、星期五早上九點開售，賣晒就玩完。但過往經驗，每次，記住係每次，官網一開賣，9:00:01就賣晒，即係「真．秒殺」。唔信？你去Jordan FB專頁睇，次次開賣9:01個專頁都被網民鬧到七彩，刪文都刪唔切就知無花無假。有粉絲傻到聯署去總公司投訴，但都無乜改善過。官方話，每次每個碼都有約150對鞋賣，一秒之內賣足過萬對，係咪搶手我唔識答你。
呢世都買唔到？
你睇到呢度，肯肯定車咗出嚟，話人手點敵過機械人？但其實，官方仲有另一個玩法，有部份「炒得過」嘅款就係喺星期二、三喺官網度做會員抽籤。又真係多得nike hk無正視過又或懶理炒家問題，登記做會員，只需一個email或FB account就搞掂。會員資料如電話號碼、地址、姓名無論係唔係重覆都唔理，即係話，一個人可以「化身千萬」開幾百個account去抽都可以。
係唔係有真買家？
Jordan今時今日已經出到31代，當然唔係對對都炒得起，好似上代30無論出咩色、點改樣都蟹到無朋友，但某啲「細冧把」就長炒長有，好似今年興玩12代，今年已經出咗至少5隻色，但出親都極速散晒，11代更加係癲咗有幾多唔見幾多。不過，即使同一代都好，個炒價都幾浮動，不過若果「炒得起」至少都可以執到三百元。
講咗咁耐，當然有好嘢介紹，事關今日開始至14日，Jordan將會復刻1代同4代，今次仲要係玩抽籤，其中，第4代選用深藍色高檔粒粒皮革製作，鞋面以精緻的絎縫車線遍佈，結合皮質鞋帶與後跟的金屬銅細節，靚唔靚就兩睇，不過，nike出親「premium」版，大多數係以質優料靚作保證（即係炒硬嘅意思），另外加上第4代喺Jordan嘅世界，都係一個幾靚嘅冧把，上次對白色蛇皮已經係有價無市，呢對真係幾值得入手……嚟炒。
若果你問有無人大拿拿用3000元買對波鞋，咁我會答：你抽中先講啦，夠有人用幾萬買精工啦。你仲要問中嘅機會大唔大？你走先啦，我唔想搞事。
至於，嗰對1代，有愛就抽埋佢，中咗咪no show唔去拎囉，無人迫你同封你account嘅。
PS.帶定頭盔，呢個唔係廣告，純粹公諸同好。
