近年不少名牌都推出 Android Wear ，不過，夾住名牌個名，除了不知功能值不值得買之外，更重要是價錢一定貴到離晒地，並非一般人可買。不過，最近 Fossil 進軍智能手錶界，價錢相對親民之餘（三千有找就買到），更有名牌優勢，就是超多錶帶及靚仔外型。而今次推出第二代的 Q Wander / Q Marshal ，價錢由 $2,450（皮帶） 至 $2,650（鋼帶） 之間，又是否物有（超）所值？下面為你實錶評測！
兩個款點分？
當行到櫃枱睇錶，都會發現 Q Wander 及 Q Marshal 兩隻錶，無論直徑及厚度都一模一樣，直接問功能有什麼分別，答案竟然是：「無！」點解要有兩個款？官方解釋就是 Q Wander 的設計會較為女性化，而 Q Marshal 就比較男性化（亦即是點解用 W 字及 M 字開頭的原因），至於兩款手錶的錶帶都可以互換，所以無論你買邊一款，都無太大分別，最重要是自己鐘意。
觸控又好唔好？
一隻名牌加持，但又可以賣二千幾蚊的智能手錶，會否將價就貨先？其實如果有，最先會反映在操作上，首先講明，手錶主要是中國制造，不過如果你看不到錶底這幾個字，其實都未必會發現，操作反應快，間中會有少少窒，但都可以接受（隻隻錶都有），而且比起上一代的反應亦都加快，廠方解釋主要是前作用 Intel 晶片，而今代改用 Qualcomm 晶片所致。
功能又如何？
其實在之前發布新錶時，都講明這兩款手錶不設心跳測量功能，所以並不能充當運動手錶使用。不過，除了心跳測量之外，其實其他功能都好齊，設有收音咪，可以利用 Google 語音功能進行搜尋功能，或是直接開啟地圖。另外，可連接手機並利用手錶鍵盤打電話，都幾方便。至於計步數、 Google Fit 都有，內置埋手機遙控拍攝 app ，影完亦可在手錶睇相，毋需自己再安裝。
優點？缺點？
作為名牌錶，都有幾個好處，第一是錶面圖案夠多，有機械錶面圖案，亦有五顏六色搶眼圖案，隨時都可以任換。另外，錶帶亦值得一讚，採用易拆設計，想幾時換錶帶都得，工具都慳埋。至於缺點，就是電量，根據廠方表示， Q Wander / Q Marshal 的電量，大約一日至半日之間，視乎你的使用量而定，亦即時說，充電線一定要跟身，好幸都有得獨立買，放多條在公司都得。
總結：性價比夠高
不少名牌都有推出智能錶，不過能用二千幾、三千蚊有找的價錢買到，老實講選擇不多，支援埋 Android Wear 更加少見。而今次以這個價錢，的確好吸引。當然，如果你是想要一隻運動手錶， Q Wander / Q Marshal 未必滿足到你，但如果平時返工戴，小編覺得不失為一個好選擇。
