無陰公！高畑裕太性侵案眾女星受害

日本男星高畑裕太早前自稱忍受不了性慾，性侵40幾歲酒店職員，隨著高畑認罪，原本以為好快可以告一段落。不過，呢單嘢近日竟然不停發酵，好似佢有份主演嘅《俠飯》，明明播到一半，就要將高畑劇份強行硬Cut，仲話可能換角重拍；佢阿媽高畑淳子，每次出門口都要同傳媒90度鞠躬道歉。高畑裕太

但勢估唔到呢股旋風愈吹愈烈，搞到好多唔關事嘅女星都「中招」，好似近年游走水著界同電視圈嘅真野恵里菜，雖然名氣唔算好大，但憑樣靚身材正，都叫冧到班宅男暈得一陣陣。但佢同高畑有份拍嗰套新片《青の帰り道》（香港應該上唔到，唔繹），因為高畑爆出咁嘅嘢就被迫中止，幾時再開鏡都唔知。

來源：Asagei Plus

不過，咁都未算慘，最慘嗰個係近日憑晨早劇《とと姉ちゃん》（當家姊姊）上位嘅高畑充希，雖則套劇被讚到天上有地下無，收視去到超越月九強檔嘅20%，但只因佢性「高畑」，就被班「暴徒」懷疑佢係高畑裕太嘅姊姊，雖則充希妹多次人前人後澄清完全無任何關係，佢喺屋企仲要係獨女，但班網民痴線到要佢拎「親子鑑定」先肯收貨。