去韓國，想食三文魚刺身，選擇地方都幾多，不過亦都有不少割客點，例如魚市場，一見到你是遊客一定開天殺價，片甲不留！不想就住食，又怕俾心割到一頸血，仲有一個選擇，就是位於新村站的三文魚商行，最低消費 14,900won（約 $105 ），即可任食三文魚，而且沒有限時，鍾意食三文魚，一定要去！ 首爾 任食三文魚 三文魚商行
這間三文魚商行是近期不少韓國人最愛到的店鋪之一，亦由於生意太好，分店都開到第十三間。至於點解要去新村？首先是新村多旅館民宿，好多人都會住這邊。其次是地點比較容易搵，只要坐地鐵 2 號線去到新村站，之後再由 3 號出口直行就到。
值得一提的是，去這間店食飯，最好避免冬天去，除了因為刺身是生冷食物之外，更重要是要在門口等！由於都有不少韓國人愛去這間三文魚商行，所以就算並非食飯時間，都會有人排隊，而排隊位全部在室外，更嚴峻的是無限時的情況下，根本好難估計幾時有人走，所以……
當然，為美食，點都要等，去到記得同店員報上名稱及人數，有位就會直接叫名，千萬不要坐得太遠。由於以平取勝，所以坐位比較窄，亦不會有太多位可以放袋。先講價錢，主要有兩種，一種是最低消費 14,900won（約 $105 ），食物包括三文魚片、炸魷魚、海鮮煎餅及沙律；至於別一種是較高級的 16,900won（約 $119 ），會多一個刺身飯可以食。至於任食主要是三文魚，沙律想再食，便要加多 2000won（約 $14 ）。
至於規則有兩條，一是必須兩個或以上才可入坐，另一個則是不可剩下三文魚，否則就是繳付百倍罰金，當然最好不要浪費食物。至於不吃魚生，都可以單點海鮮烏冬食（ 9000won ，約 $63 ），抵不抵食便見仁見智。
而食物好不好食才是王道，主角三文魚，厚切，新鮮好食，入口即溶。海鯖煎餅都好食，煎得夠香口，同樣是任食。至於沙律味道清新又爽口，但要加錢再食，本人就 pass 了。至於喜出望外的是炸魷魚，軟身又彈牙，証明是超新鮮魷魚，絕對不能錯過。總體而言，這間三文魚商行超值得一試，絕不後悔。
三文魚商行 연어상회
地址：서울특별시 서대문구 연세로12길 20 ／首爾特別市西大門區延世路12街20號
點去？地鐵 2 號線去到新村站，之後再由 3 號出口直行
營業時間：11:00 至凌晨 02:00
電話：02 363 3177
相關網址
