改名有運行？能年玲奈終有 Job 聲演動畫電影《この世界の片隅に》

前排講完，日本「海女」能年玲奈被事務所封殺咗兩年，正式改名「のん」（讀音：Non）再戰藝能界，不過，始終有同事務所關係極差嘅前科，自然係大把手尾跟，好似日前佢以新名開IG戶口後，就立即傳出事務所準備一系列「再封殺計劃」，有傳有人去晒所有社交網站度以「のん」註冊，誓要搞到對方消失為止。

但係，能年話晒都係23歲美少女，演技都有番咁上下，昨日有電影公司宣布，嚟緊將會搵佢聲演動畫電影《この世界の片隅に》，套嘢仲更加開正能年嗰瓣，講二次大戰後嘅日常生活，雖則話能年能憑呢套片徹底翻生就誇張咗，但計下數，能年自14年套《月海姬》都餓咗兩年有多，佢拍檔菅田將暉（即幪面超人W）已經紅到無雷公咁遠，更加唔使講同為「海女」嘅有村架純，今次終於有番Job接，可謂還得神落。