日本女星志田未來近排認真多災多難，先係緋聞男友神木隆之介，被影到同F Cup女星佐野雛子「玩天光，著情侶裝」出門，之後主演新片《青空エール》（唔使知邊度繹：青空吶喊），23歲嘅佢竟然被安排演高中生，而大佢5年、同期出道嘅戶田惠梨香就演佢「由細睇到佢大」嘅Miss，擺明顯寸佢身材、樣貌仲係幼兒級，搞到佢無晒心機，出席活動丁點笑容都欠奉。 志田未來
不過無論幾慘，生活依然要繼續，日前電視台公開咗，佢嚟緊會喺江口洋介套新劇《はじめまして、愛しています。》（中繹：初次见面，我愛你。）客串一角，套劇就係講江口洋介收養咗個被人遺棄嘅小朋友，譜出一段非血緣嘅溫情片。咁志田演乜已經唔使多講，未就係演個丟低個仔個媽媽囉。劇入面，志田就做番曾紅極一時嘅《14歲媽媽》入面嘅未成年懷孕婦，十幾歲意外搞大後，丟低個仔過咗幾年又想去認親。嘩！人哋剛剛甩拖啫，唔係又嚟潤佢下嘛？佢事務所搞乜，咁鍾意搵啲角色嚟畀佢「挑戰」嘅。
來源：Oricon Style
