日本天團SMAP年初有成員玩嘢，想離開事務所自己發展，事件轟動咗藝能界，搞到成個日本都要出手挽留，甚至連經濟學家都出埋口，話SMAP拆伙會影響日本唔見咗上億日元，最後有傳係木村老婆工藤靜香出面先搞掂，五子要排排企道歉，誓神劈願嗌留低。不過，搞完場大龍鳳後，SMAP五條友就被日傳夜傳不和，每隔兩個禮拜就話會散Band，連事務所所長Johnny喜多川都要打開口牌話SMAP永不解散先叫平息咗一陣。 SMAP 解散
可惜，先幾日佢哋嘅超長壽節目《SMAP X SMAP》突然通知話唔錄，令到不和傳聞又再次湧現。正當人人以為吉多川爺爺又要派定心丸之際，噚晚深夜，事務所忽然發千字文Fax聲明畀各大傳媒，話SMAP決定今年12月31日正式解散，五個成員將會繼續留低，但就會單飛發展。個聲明大致講話，五條友經過大半年嘅商討，發現難以再繼續合作，所以一致決定散Band。其中，有成員更講到明：「與其話休息，倒不如想解散多啲。」間接承認咗五人之間已經去到水火不融嘅境地。日媒甚至話，上週喺《SMAP X SMAP》扮桐谷美鈴嘅香取慎吾，係今次事件嘅主力，事關佢堅想結婚。（編按：Johnny事務所有條不成文規定，每隊只有一個成員可以結婚，而木村結咗九世。）
點都好，今次出埋聲明，SMAP應該都係堅．解散，但話又說回來，其實除咗今個星期拍《SMAP X SMAP》外，五條友都係名存實亡咗好耐啦。
來源：Yahoo Japan
