日本傳媒久唔久就會訪問下啲女藝人，問下佢哋護膚心得、Keep Fit方法，甚至問埋人哋Relax方法。除咗八卦，仲可以幫女藝人Sell下代言產品或開拓客路，最隹例子，就係出晒名Fit爆嘅菜菜緒，經常同傳媒大講豐胸修身秘訣，啲語帶雙關嘅言詞搞到宅男流晒鼻外，仲令佢順利當上內衣代言人。 北川景子
不過，世事無絕對，女神北川景子日前上咗清談節目《しゃべくり007》(台繹：閒聊007)，被問到每日沖涼步驟同時間，正當宅男們豎起對耳，開始放空等FF時，景子就倒米自爆每日沖涼僅20秒，佢話，每日忙到痴線，返到屋企已經零晨，所以狗衝去沖涼時，一邊舉高個花灑，一邊就要開始記台詞，之後默念廿秒，涼完著衫。
一盤冷水照頭淋都未夠，主持死都要再問，景子有無去浸露天溫泉，女神再次毫不理人感受，話入行之後再無試過，仲補多飛講其實都唔太鍾意浸溫泉，事關露天溫泉覺得會當有落葉跌落身，又要再洗過好麻煩，講完。搞到成班男嘉賓勁無癮。
來源：マイナビニュース
